2007 ലെ ഒരു വൈകുന്നേരം ..ആ തിയ്യതിക്ക് ഞാൻ പറയാൻ തുടങ്ങുന്ന സംഭവവുമായി അത്ര പ്രസക്തിയുണ്ടോയെന്നറിയില്ല ..എങ്കിലും ...കയ്യിൽ ചെമ്പരത്തിയുടെ വടിയും ,സയൻസും സമൂഹ്യവുമടക്കം നിറയേ പുസ്തകങ്ങൾ അടക്കിപിടിച്ച് എനിക്ക് ചുറ്റുമിരുന്ന കുട്ടികളോട് ചോദ്യങ്ങൾ ചോദിച്ചും ഉത്തരങ്ങൾ പറഞ്ഞും ഞാൻ നിന്നു .പതിനഞ്ചിൽ കൂടുതൽ കുട്ടികൾ ഞാൻ അന്ന് ട്യുഷൻ എടുത്തിരുന്നു .അവർക്കിടയിൽ തൊണ്ട പൊട്ടുമാറു ച്ചത്തിൽ പ്രിഥ്വിരാജ് ചൗഹാനെക്കുറിച്ച് പറഞ്ഞു കൊണ്ടേയിരിക്കു കയായിരുന്നു ഞാൻ .(ചൗഹാനും ഈ കഥയിൽ പ്രസക്തിയില്ല കേട്ടോ )ഇതിനിടക്ക് കടലാസു പെൻസിൽ കൊണ്ട്" arrival " "brush " എന്നീ വാക്കുകൾക്ക് ഇമ്പോസിഷൻ എഴുതി പഠിച്ചിരുന്ന രണ്ട് LKG / UKG {കൃത്യമായി ഓർകുന്നില്ല ..എന്തായാലും ഒന്നാം ക്ലാസ്സിൽ കൂടുതൽ ആയിരുന്നില്ല ) കുട്ടികൾ തമ്മിൽ പെൻസിലിന്റെ മുനയൊടിഞ്ഞതിന്റെ പേരിൽ വഴക്കുണ്ടായി അവസാനം .വാക്കുതർക്കത്തിൽ തോറ്റുപോയകുട്ടി സങ്കടം സഹിക്ക വയ്യാതെ പറഞ്ഞു ..."പണ്ടാരം എൻറെ പെൻസില് കേടെരത്തി ".പ്രിഥ്വിരാജ് ചൗഹാന്റെ പുസ്തകം ഒരൊൻപതാം ക്ലാസുകാരിക്ക് കൈമാറി ഞാനവന്റെ അടുത്തേക്ക് ചെന്നു ...അവനോട് എഴുനേട്ട് നിൽക്കാൻ പറഞ്ഞു ."എന്തായിപ്പോ പറഞ്ഞേ ...അങ്ങനെ പറയാൻ
പാടുണ്ടോ?"പണ്ടാരം എന്ന വാക്കുച്ചരിച്ചതിന്റെ പേരിൽ ഞാനവനെ വഴക്കു പറഞ്ഞു .,തല്ലി ,,,ആ വാക്കിൻറെ അർത്ഥമെന്തെന്നറിയില്ലെങ്കിലും സഭ്യതയുടെ പേരു പറഞ്ഞ് ഞാനവന്റെ നേരേ ആക്രോശിച്ചു .അവൻറെ കുഞ്ഞുകണ്ണുകൾ നിറയുന്നുണ്ടായിരുന്നു . അവനോടു പഠിക്കാൻ പറഞ്ഞ് ഞാൻ വീണ്ടും ചൗഹാനിലേക്ക് ...
കുറേ നേരത്തേക്ക് അവൻ ഒന്നും മിണ്ടിയില്ല ...എഴുതി തീർക്കാനുള്ള വാക്കുകളുടെ എണ്ണം തിട്ടപ്പെടുത്തി അവനെന്നെ വിളിച്ചു .ദീദി ...(എന്നെ അങ്ങനെയാണ് അവർ വിളിച്ചിരുന്നത് )സ്ഥിരമായി സ്കൂളിലേയും നാട്ടിലെയും വീട്ടിലെയും കളിസ്ഥലങ്ങളിലെയുമൊക്കെ പിണക്കങ്ങളും ഇണക്കങ്ങളുമൊക്കെ എന്നോട് പറയുമ്പോൾ അവൻ ഉപയോഗിക്കാറുള്ള ഒരു കൊഞ്ചൽ ആ വാക്കിലുണ്ടായിരുന്നു .
''ചീത്ത വാക്കുകള് പറയ്ണ കുട്ട്യോളുന്നോട് മിണ്ടണ്ട''- അവൻറെ മുഖഭാവം കണ്ട് സങ്കടം തോന്നിയെങ്കിലും ദേഷ്യത്തോടെ ഞാൻ പറഞ്ഞു. അവൻ കുറേ ചിണുങ്ങി നോക്കി ഇനി അങ്ങനെ പറയില്ലെന്ന് അവൻ പറയുന്നത് വരെ ഗൗരവം തുടരാമെന്ന് ഞാനും കരുതി. ഏറെ ചിണുങ്ങിയിട്ടും ഫലമില്ലെന്ന് കണ്ട് അവൻ പറഞ്ഞു "ദീദി -സംശയുമുണ്ട് "ആ വാക്കിനു മുൻപിൽ ടീച്ചർക്ക് ഉത്തരം പറയാതെ വയ്യല്ലോ ...
ഉം? ഞാൻ ഗൗരവം വിടാതെ ചോദിച്ചു ".ദീദീ ദീദി ഇന്നലെ ഐഡിയ സ്റ്റാർ സിംഗർ കണ്ടോ?"അവൻ ചോദിച്ചു .ഇതാണോ നിൻറെ സംശയം ?ഇരുന്നു പഠിക്ക് ...ഞാൻ മുഖം തിരിച്ചു .പറ ദീദേയ് നിക്ക് സംശയുണ്ട് .അവന്റെ കണ്ണുകൾ എവിടേയോ എന്നോട് കെഞ്ചുകയായിരു ന്നു ..ഞാൻ പറഞ്ഞു. ഉം കണ്ടു ..എന്താ ?
അവൻ തുടർന്നു ."ന്നലെ ജയസൂര്യയായിരുന്നു ഗസ്റ്റ്, .സിൽമാനടൻ, ദീദി കണ്ടോ?"ഞാൻ വീണ്ടും പഠിക്കാൻ പറഞ്ഞപ്പോൾ അവൻ മത്സരാർത്ഥിയായ സന്നിദാനന്ദൻറെ ഗനാലാപനത്തെ വർണ്ണികുകയായിരുന്നു ...കൊച്ചുവായിൽ അവൻ "സംഗതിയെ"കുറിച്ച് പറയുന്നത് കേട്ടു നിൽക്കുമ്പോൾ അവനോടുള്ള എൻറെ പിണക്കത്തെ കുറിച്ച് ഞാൻ മറന്നു പോകുകയായിരുന്നു ..നീ ഇരുന്നു പഠിക്ക് എന്നും പറഞ്ഞു ഞാൻ തിരിഞ്ഞതും അവനെൻറെ ചുരിദാറിൻ തുമ്പിൽ പിടിച്ചു നിർത്തി ,എന്നിട്ട് പറഞ്ഞു - ശരിക്കും സംശയാ ...
ഹും പറ . അവൻറെ മുഖഭാവം എന്നിൽ വരുത്തിയ ചിരി മറച്ചു പിടിച്ച്
ഞാൻ പറഞ്ഞു. അവൻ തുടർന്നു -ഇന്നലെ സന്നിദാനന്ദൻറെ പാട്ടു കേട്ടുകഴിഞ്ഞ് ജയസൂര്യ ഞാൻ നിങ്ങടെ പണ്ടാരം ഫാനായിപ്പോയി എന്നു പറഞ്ഞപ്പോൾ ദീദി കയ്യടിച്ചില്ലേ ? (ടി.വി കാണുമ്പോൾ കയ്യടിക്കുക
ആങ്കറുടെ ചോദ്യങ്ങൾ തിരുത്തുക പൊട്ടത്തരം കേൾക്കുമ്പോൾ കളിയാക്കുക തുടങ്ങി ടി .വി കാണൽ ഒരാഘോഷമാക്കുന്ന എന്നെ അവൻ ശ്രദ്ധിക്കുകയും ഒരിക്കൽ അതേ പറ്റി എന്നോട് ചോദിക്കുകയും ചെയ്തിരുന്നു ...അതു കൊണ്ടായിരിക്കാം ഇങ്ങനെ ഒരു ചോദ്യം } ഇവനെന്താ ചോദിക്കാൻ തുടങ്ങുന്നതെന്ന് ആലോചിക്കുക പോലും ചെയ്യാതെ ഞാൻ പറഞ്ഞു - " കയ്യടിച്ചു".അവൻറെ കണ്ണുകൾ നിറഞ്ഞു ..അവനെന്നോട് ചോദിച്ചു " അതെന്താ ദീദി ജയസൂര്യ പറഞ്ഞപ്പോൾ കയ്യടിക്കുകയും ഞാൻ പറഞ്ഞപ്പോൾ വടി എടുത്തടിക്കുകയും ചെയ്യുന്നേ ?""എന്തു മറുപടിയാണ് പറയേണ്ടതെന്നറിയാതെ ഞാൻ പരുങ്ങിപോയി എന്നതാണ് സത്യം ...സാഹചര്യങ്ങൾക്കനുസരിച്ച് വാക്കുകൾ ലഘുവാകുന്നതും അർത്ഥം മാറുന്നതും പറയാൻ ശ്രമിച്ചിട്ടും അവൻറെ ചിണുങ്ങലിന് മുൻപിൽ ഞാൻ പരാജയപ്പെട്ടു ...
വാൽകഷ്ണം :ദൈവകൃപയാൽ മൂന്ന് വർഷങ്ങൾക്ക് മുൻപ് ട്യുഷൻ എന്ന പരിപാടി ഞാൻ നിർത്തി .ഇല്ലായിരുന്നെങ്കിൽ ഇന്നു സിനിമയിൽ വരുന്ന അസഭ്യവർഷങ്ങളുടെയും അതു കേൾക്കുമ്പോൾ ആളുകൾ ചിരിക്കുന്നതിനെ കുറിച്ചും ചോദിച്ചാൽ അവർക്ക് ഞാൻ എന്തു പറഞ്ഞു കൊടുക്കും..????
....ഇത്തരം ചോദ്യങ്ങൾക്ക് മുൻപിൽ ഉത്തരം മുട്ടി പോകാൻ സാധ്യതയുള്ള എല്ലാ ടീച്ചർമാർക്കുമായി ഈ ഓർമ ക്കുറിപ്പ് സമർപ്പിക്കട്ടെ ....